Cargando...
Ñane retãme kóicha jahasa arapokõindy Marangatu
Oñepyry pindo karai arateĩme (Domingo de Ramos) ha upéi ojeromandu’a umi ára Hesu Kirito ojejapyhy, oñemoinge ramo tovakeópe (tribunal), ojehupíramo kurusúre, omano ha oikovejeýramo guare.
Pe ararundy – miércoles voi guive oñemba’apóma tembi’u aporã.
Oĩ avei oñembisóva avati angu’ápe ha upéi, mbeguakatúpe, kuñakaraikuéra oñepyrũma ombojehe’a avatiku’i, aramirõ, kesu, kamby, kure ñandy ha ani, ha hapykuérintema oikoñepyrũma chipa opáichagua: lopi, jakare ha ambuéva, oñemboguapýva ojy haguã— pakova rogue ári. Péicha, ogakuéra rupi maymávante ombosako’i ha ombojy chipa, sópa, chipa guasu, ryguasu, kure ha ovecha ro’o umíva tatakuápe. Oiko peteĩ jejuhupa guasu tembi’u apohápe.
Arapópe - jueves katu opavavete ijaty peteĩ mesa guasu jerére ha upépe oiko pe karuguasu. Pyhare, tupãópe, oiko pe jepyhéi (lavatorio de los pies) ha ojehecha ha oñehendukuaa avei umi España ñe’ẽme ojeheróva "Estacioneros" térã "Pasioneros", omoirũramo —purahéi asy rupi Hesu Kirito jehasa asy.
Pe arapoteĩ - viernes katu, asaje rupi, tupãóme hyapu peteĩ yvyrapararã (matraca), oporohenóiva. Péva ojehu vove, opavavéva oho tupãópe ogueromandu’ajey haguã Hesu Kirito ñemano. Upépe oikoraẽ mandu’a upe kurusu rapére (Viacrucis); ha upéva rire katu Hesu Kirito ra’ãnga ojehupijey kurusúre ha ojeromandu’a umi "pokõi ñe’ẽ". Upéi Hesu Kirito rete oñemboguejy ha oñemoinge tupão ryepýpe ha opavavéva oñemboja ojapóvo pe tupãitu. Arapoteĩ ha’e ára ikirirĩvéva. Avave ndaikatúi osapukái térã oñe’ẽ hatã. Ndaikatúi ñañani ha mitãnguéra ndaikatúi oñembosarái. Arapokõindy Marangatu oguãhẽ ijapýpe Hesu Kirito jeikovejeýre Pascua de Resurrección—.