Cargando...
Emoñe’ẽ ko haipyre
Terere mombe’upy
Ohai David Galeano
Oñemombe’u yma, ymaitereirasa, pytaguakuéra og̃uahẽ mboyve Amérikape, ndaje Ñande Ru Papa hetaite mba’e apytépe omoheñóikuri pe ka’avo neporãmbajepéva hérava ka’a ha ipytyvõharakuéra ndive ombo’ékuri guaranikuérape mba’éichapa ha mba’erãpa oipurúta hikuái upe ka’avo.
Ñande Ru ndaje ohechaukákuri Guaranikuérape mba’éichapa ha’ekuéra ikatu oñembopiro’y ha upérõ ndaje ogueraha chupekuéra peteĩ yvu oĩha meve osẽhágui y ho’ysã ha hesakã asýva.
Upépe he’ijekoraka’e peteĩva “Emyenyhẽ ñandéve pe hy’a apu’a reguerekóva” ha upéikatu ohenói ambuépe ha ejerure chupe peteĩ ka’ygua oguerekóva ipópe ha osẽ he’i opavavépe: “Ko ka’yguápe amoĩta pe ka’a rogue amongu’íva’ekue” ha upe rire oikytĩkuri peteĩ takuapo’imi ha he’ijey chupekuéra “Kóva ko takuapo’i rupi aisyrykúta che ha upéi peẽ”, ha upéicha ojapo hikuái. Maymavénte ipy’arorýkuri oñandúvo mba’éichapa pe y péicha oisyrykúva hikuái ombohasa y’uhéi ha ombopiro’y chupekuéra.
Upe guive guaranikuéra ha ñande iñemoñarekuéra, jaisyryku ára ha ára pe mba’e porãite ha’éva terere. Ag̃akatu, Cháko Ñorãirõme, ñane retãygua oisyrykuve ha ohecharamovékuri terere ndaipórigui y upe yvy guasuetépe ha terere añoite ohupytypa ha ombopiro’y chupekuéra.
Ñande Ru ombojoapy iñe’ẽ ha he’íjekoraka’e guaranikuérape: “Ko jopói guasuete ame’ẽva peẽme peñembopiro’y hag̃ua niko terere, héra ojoguágui tyapu y ojapóva ñande jurúpe jaisyryku jave takua po’i rupive”, ha ombojoapyve “terere peisyrykútajepi peime jave ojoapytépe, pene tapỹi térã peguata jave arahakuetépe. Terere penemoirũta, ome’ẽta peẽme py’aguapy, penembovy’áta ha omoheñóita mborayhu pende apytépe”.
Upe guive ha ko’ág̃a peve avei oñemoĩ ipype pohã ro’ysã térã pohã piro’y opaichagua: kokũ, santa Lucía morotĩ , ka’arurupe, tarope, parapara’i, cedrón kapi’i, kapi’ikatĩ, mbokaja rapo, limõ, aguakáte rogue, menta’i ha ambuéva. Terere niko ha’e ñane retã mba’e teete.
Fuente: https://bit.ly/3zhjRRq