Cargando...
I- Emoñe’e˜mína ko haipy
Pyhare marangatu árape, pehẽnguekuéra ijatypaite ituvakuéra rógape. Umi okarayguáva ha oikóva ambue ñane retã táva rupi térã oikóva ambue tetãme, ojevypaite hógape ikatuhag̃uáicha ohasa oñondivepa Pyhare marangatu ha Arareñói.
Tatakuápe oñembojy umi tembi’u hevéva ha ñanemba’etéva, umíva apytépe: kure, ryguasu, vaka ro’o ha ovecha. Upe tatakuágui osẽ avei hyakuã asýva sópa paraguái ha chipa guasu. Peteĩ japepo guasúpe katu oñembopupu mandi’o.
Upéicha avei, ojejapo pe mba’erykue hérava keleriko, oñembojehe’ávo opaichagua yva: pakova, narã, avakachi ha úva. Peteĩ kambuchi renyhẽte kelerikógui oñemoĩ pe mymbakeha (pesebre) ykére ojeitykua hag̃ua -peteĩ kaguápe- opavave oñembojávape ohecha hag̃ua pe mymbakeha.
Ka’arupytũvo, mitã ha mitãrusumimi ojahu ha ipotĩ'asýma, oñemoapesýi ha omoĩ ijao pyahu. Ha’ekuéra oho opavave hogaykereguápe, ohechávo pe mymbakeha. Upépe ogajarakuéra omomaitei, ombohasa ha omboguapy chupekuéra pe mymbakeha renondépe. Ogajarakuéra ogueropojái chupekuéra sópa ha keleriko; ha ohokuetévo hikuái ome’ẽ chupekuéra mba’ehe’ẽmimi. Upe jave katuete umi ouva’ekue ohecha mymbakeha, he’íva’erã “Iporãitépa nde pesebre”.
Upe rire, pyharepytepotávo térã pyharepytete jave, oñepehẽnguéva oguapypaite mesa jerére, oñembo’apéva ao po’ípe, okarupyharévo; omog̃uahẽvo ijapýpe Pyharemarangatu ha omomaiteívo Arareñói, ohenduhápe opaichagua arareñói mba’epu’i ha purahéi. Pyharepyte og̃uahẽvo, mbokapupara pa’ũme, ñeañuã hatãva rupi, ñehetũ ha tesaýpe, opavave oñomomaitei, he’ívo ojupe VY’APAVẼ TUPÃRA’Y ARAREÑÓIRE. Ipahápe, opavave oñemboja mymbakeha renondépe ha oñembo’e omomorãvo Tupãra’y Arareñói.
Fuente: https://bit.ly/3BfGxAS