Monẽ’ẽrã:
Pohã ñana (2)
“Ko’ãva ha’e ñande ypykue ohejáva’ekue ñandéve, ha’ekuéra oiporúva ymaiteguive, ha ko’ág̃a ára pyahúpe heta oĩ ohejaséva tesaráipe”; péicha one’ẽ ha’eño g̃uaig̃uimi oiporavo aja pohã hasývape g̃uarã, hetakuére oha’arõva ichugui pokatu oguerekóva oipohano hag̃ua mba’asy jekuaa’ỹ are guivéma oñandu ha omokangýva hekovekuéra.
Kuñakarai pohãnohára katu ku hesarairamoguáicha ha’arõháragui oñe’ẽ jey ha’eño ha he’i ko’ã mba’e: “Ka’a mara’ỹ héra opáichagua ñana omongueráva mba’asy. Pohã ñanáre oñeñangareko porãva’erã ani ipochýtei ijára. Jaipo’o reíramo ñaikoteve’ỹre, ñañohẽramo hykuere oimehápe, ñapyrũ térã ndajajeroviáiramo hese ñanemongueráne hag̃ua, ikatu nanembohasyvéguei ha ndajajuhumo’ái pohã mba’asy omongueráva araka’eve”.
Lea más: Ñana omongueráva (1)
Nane retãpýpe heta jareko pohã ñana oporomongueráva ipokaturamoguáicha ha heta avei oĩ kuña ha kuimba’éva oguenohẽva arapýgui arandu, oipohãno ha omonguera hag̃ua mba’asy vai, mborayhu tarova ha ambue mba’e oñandu ha ombohasýva tekove heko marã ha iñe’ã'ỹvape, ndohekáiva Tupã mborayhu, omonguera ha ombopiro’ỹva’erã arapaha’ỹ meve hi’ãnga rekove.
Tembiaporã
I Embopapapy ñe’ẽjoaju he’iséva ndive.
1. Ko’ãva ha’e ñande ypykue ohejáva’ekue ñandéve.
2. Ha’ekuéra oiporúva ymaiteguare.
3. Ko’ág̃a ára pyahúpe heta oĩ ohejaséva tesaráipe.
4. Péicha one’ẽ ha’eño g̃uaig̃uimi oiporavo aja pohã hasývape g̃uarã.
5. Pohã ñanáre oñeñangareko porãva’erã ani ipochýtei ijára.
6. Ndajajuhumo’ái pohã mba’asy omongueráva araka’eve.
7. Nane retãpýpe heta jareko pohã ñana oporomongueráva.
8. Jaipo’o reíramo ñaikoteve’ỹre.
9. Ñañohẽramo hykuere oimehápe.
10. Ndajajeroviáiramo hese ñanemongueráne hag̃ua.
___ Nunca encontraremos los medicamentos para curar la enfermedad.
___ De esta manera la anciana habla sola mientras escoge los medicamentos para los enfermos.
___ En nuestro país tenemos muchas plantas medicinales que curan.
___ Estos son los legados de nuestros antepasados.
___ Si no creemos que nos curará.
___ Si derramamos su jugo en cualquier lugar.
___ Las plantas medicinales deben ser cuidadas para que no se enoje su dueño.
___ Si la arrancamos sin necesitarla.
___ Ahora en la época moderna muchos quieren dejarlo en el olvido.
___ Que ellos usaban desde hace mucho tiempo.
II Embohovái.
1. Mba’épa ha’e ka’a mara’ỹ.
2. Mba’éichapa ikatu oñeñangareko porã pohã ñanáre.
3. Mba’eichagua mba’asýpa ikatu omonguera pohã ñana.
Oĩ porãva
I. 6- 4- 7- 1- 10 -9 -5 -8 -3 -2
Fuente: MEC. Lengua y Literatura Castellano-Guaraní. 9.o grado.